राज्यस्तरीय शिक्षक गौरव पुरस्कार सोहळा आणि १०वी उत्तीर्ण विद्यार्थ्यांचा सत्कार

ठाणे : समर्थ फाऊंडेशन आणि एज्यूरिक हब ठाणे यांच्या संयुक्त विद्यमाने आयोजित “राज्यस्तरीय शिक्षक गौरव” पुरस्कार सोहळा रविवार, २२ सप्टेंबर २०२४ रोजी सकाळी १० वाजता, मराठी ग्रंथ संग्रहालय सभागृह, मामलेदार कचेरीजवळ, स्टेशन रोड/प्रभात रोड, ठाणे पश्चिम येथे उत्साहात पार पडला. या सोहळ्यात राज्यातील विविध जिल्ह्यांमधून निवड झालेल्या गुणवंत शिक्षकांचा सन्मान करण्यात आला, तसेच १०वी उत्तीर्ण झालेल्या विद्यार्थ्यांचाही विशेष सत्कार करण्यात आला.

या कार्यक्रमाचे प्रमुख पाहुणे महाराष्ट्र विधानपरिषद आमदार ॲड. निरंजन डावखरे होते. सन्माननीय पाहुण्यांमध्ये श्री. मिलिंद बल्लाळ (मालक व संपादक, ठाणे वैभव वर्तमानपत्र) आणि श्री. राजेश जाधव (उपाध्यक्ष- ठाणे शहर भाजपा आणि संस्थापक- ब्रह्मांड कट्टा, ठाणे) हे उपस्थित होते. समर्थ फाऊंडेशनचे अध्यक्ष प्रा. डॉ. दीपक साबळे यांनी प्रमुख पाहुण्यांचा शाल, पुष्पगुच्छ आणि सन्मानचिन्ह देऊन सन्मान केला.

कार्यक्रमाचे संपूर्ण सूत्रसंचालन आणि निवेदन ॲड. सुनिता साबळे यांनी केले. कार्यक्रमाची सुरुवात दीपप्रज्वलनाने झाली, त्यानंतर सरस्वती वंदना आणि महाराष्ट्र गीत सादर करण्यात आले.

प्रमुख पाहुणे म्हणून बोलताना आमदार ॲड. निरंजन डावखरे यांनी शिक्षकांसमोर तंत्रज्ञानाचे महत्त्व स्पष्ट केले. त्यांनी माकड व टोपीवाला या कथेद्वारे शिकवण्याचे माध्यम आणि पद्धती कशा बदलत आहेत, हे अतिशय प्रभावीपणे मांडले. त्यांच्या मते, आजच्या काळात शिक्षकांनी तंत्रज्ञान साक्षर असणे अत्यंत आवश्यक आहे, कारण सध्याचा विद्यार्थी वर्ग शिक्षणासाठी विविध तंत्रज्ञानाच्या माध्यमांचा वापर करतो. त्यामुळे शिक्षकांनी विद्यार्थ्यांपेक्षा एक पाऊल पुढे राहणे गरजेचे आहे.

सन्माननीय पाहुणे श्री. मिलिंद बल्लाळ यांनी शिक्षकांच्या कार्याबद्दल गौरवोद्गार काढले. त्यांनी सांगितले की, शिक्षक जर सक्षम असतील तर देशाचे भविष्य उज्ज्वल राहील. शिक्षणक्षेत्रातील बदल आणि नव्या तंत्रज्ञानाच्या प्रभावाबद्दल बोलताना त्यांनी सांगितले की, पूर्वी शिक्षकच विद्यार्थ्यांसाठी ज्ञानाचा एकमेव स्रोत होते, परंतु आता विद्यार्थ्यांना माहिती मिळवण्यासाठी अनेक माध्यमे उपलब्ध आहेत. त्यामुळे शिक्षकांनी सतत स्वतःला अपडेट ठेवणे गरजेचे आहे.

या सोहळ्यात महाराष्ट्र राज्यातील विविध जिल्ह्यांमधून निवड झालेल्या शिक्षकांचा सन्मान करण्यात आला. शिक्षकांनी त्यांच्या क्षेत्रात केलेल्या महत्त्वपूर्ण योगदानासाठी या पुरस्काराने त्यांचा गौरव करण्यात आला.

या कार्यक्रमात १०वी उत्तीर्ण विद्यार्थ्यांचा सत्कारही करण्यात आला. त्यांच्या शैक्षणिक यशाचा गौरव करून त्यांना पुढील शिक्षणासाठी शुभेच्छा देण्यात आल्या.

या शानदार कार्यक्रमाचा समारोप राष्ट्रगीताने करण्यात आला. कार्यक्रमाचे समारोपाचे आभार प्रदर्शन ॲड. सुनिता साबळे यांनी केले.

हा कार्यक्रम शिक्षक आणि विद्यार्थ्यांच्या सन्मानाचा एक महत्त्वपूर्ण सोहळा ठरला, ज्यातून शिक्षणक्षेत्रातील बदलत्या गरजा आणि शिक्षकांची भूमिका अधोरेखित करण्यात आली.